Piktori i njohur nga Voitsbergu- landi i Steirmarkut , Haxhi Fejzullahu, gjatë këtyre ditëve hapi ekspozitën e tij të titulluar „Art Exhibition“ në Graz të Austrisë, në kuadër të festave të Nëntorit. Kjo ekspozitë, e mbajtur në Straßganger Kulturzentrum dhe udhëhequr nga artistja e njohur austriake Gina Harg, ka tërhequr një numër të madh vizitorësh, përfshirë artdashës nga Austria dhe diaspora shqiptare.

Gjatë një interviste për Radio Helsinki, Fejzullahu ndau frymëzimin e tij për krijimin e këtyre veprave, të cilat përmbajnë motive nga jeta në vendlindje dhe përditshmëria në mërgim. Ai theksoi qëllimin e ekspozitës si një prezantim dualist të përvojës së një mërgimtari, i cili bashkon kujtimet dhe realitetin në një harmoni artistike me ngjyra dhe motive të veçanta.

Në hapje, Gina Harg kishte mbajtur një fjalim mbi rëndësinë e artit të Fejzullahut, duke shprehur mirënjohjen për pjesëmarrjen e madhe dhe duke vlerësuar lart ekspozitën si një mesazh të fuqishëm për krijimtarinë dhe kulturën shqiptare.

Ekspozita përfshin rreth 30 piktura, të cilat janë mirëpritur jo vetëm nga shqiptarët, por edhe nga komuniteti austriak, duke dëshmuar që arti shqiptar gjen vend dhe vlerësohet ndërkombëtarisht.

Në këtë ekspozitë, mesazhi kryesor i Fejzullahut është që shqiptarët jo vetëm që krijojnë art cilësor, por janë edhe ambasadorë të kreativitetit në fushën e artit. Ekspozita në Graz është vetëm fillimi, pasi piktori ka plane për të prezantuar punimet e tij në Suedi, Holandë, Danimarkë, Gjermani dhe më tej.

Kjo ngjarje shënon një moment të rëndësishëm për promovimin e artit dhe kulturës shqiptare në Graz.